A cooperativa As Vacas da Ulloa de Palas de Reis recibiu hoxe aos estudantes de cuarto curso de secundaria do colexio San José de Lugo para mostrarlles como funciona unha cooperativa gandeira.
Esta actividade sobre cooperativismo está dentro do obradoiro "Divulgación do emprendemento e de experiencias cooperativas como modelo de éxito”.

É a primeira vez que As Vacas da Ulloa acolle un destes obradoiros, e durante o percorrido, o persoal da entidade explicoulles as vantaxes de funcionar en cooperativa, como se produce o leite e algúns procedementos de manexo do gando.

Esta iniciativa promovida por AGACA e a Rede Eusumo busca mostrar as vantaxes do cooperativismo e a economía social como modelos de negocio que poden desenvolverse con éxito no medio rural e en multitude de sectores produtivos e de servizos. A Rede Eusumo é unha rede de colaboración impulsada pola Secretaría Xeral de Emprego da Xunta de Galicia para o fomento do cooperativismo e a economía social que conta co financiamento do Ministerio de Traballo, Migracións e Seguridade Social.