A Fundación Terra de Trasancos recibiu onte a medio centenar de estudantes de secundaria do colexio lucense María Auxiliadora e unha vintena do IES Leixa de Ferrol. Esta actividade está dentro do obradoiro “Divulgación do emprendemento de experiencias cooperativas como modelo de éxito”, enmarcado dentro do programa da Rede Eusumo e organizado pola Asociación Galega de Cooperativas Agroalimentarias (AGACA).

O obxectivo desta actividade é difundir o funcionamento da economía social para que o alumnado teña en conta este modelo de negocio para desenvolver unha carreira profesional ao rematar os estudos.
Nesta xornada, os estudantes aprenderon as cualidades que fan das cooperativas un modelo de negocio sustentable e estable no medio rural, ademais de coñecer as instalacións e o funcionamento de Terra de Trasancos, que desenvolve actividades en varias áreas, entre elas agrícola, supermercado e perruquería.

Rede Eusumo

Esta actividade enmárcase no programa de actuación 2019 da Rede Eusumo. A Rede Eusumo é unha rede de colaboración impulsada pola Secretaría Xeral de Emprego da Xunta de Galicia para o fomento do cooperativismo e a economía social que conta co financiamento do Ministerio de Emprego e Seguridade Social.