Hoxe constitúese Nós, as mulleres, Asociación de Mulleres de Cooperativas Agroalimentarias de Galicia, no marco do obradoiro “Apoderamento de Mulleres Socias de Cooperativas” e que agrupará a mulleres vinculadas ás cooperativas socias de AGACA.

A entidade busca ser a punta de lanza para o desenvolvemento efectivo e integral da muller e das súas capacidades de participación, así como dar visibilidade á muller profesional en todos os ámbitos.

O día 11 de xullo continúan as actividades do obradoiro, e posto que o obradoiro busca promover a fórmula cooperativa como base da mellora e formar a mulleres cooperativistas en actividades produtivas mediante exemplos de éxito, este día visitarase dúas entidades: Lutega, cooperativa produtora de lúpulo, e Orballo, que produce té.

O devandito obradoiro remata o 18 de xullo en Compostela, con relatorios sobre emprendemento, igualdade e asociacionismo, a cargo de Covadonga Toca, secretaria xeral de Emprego; Susana López, secretaria xeral de Igualdade; Carmen Martínez, responsable de Igualdade de Cooperativas Agro-alimentarias de España, e Ruth Rodríguez, axente de igualdade de xénero en Agaca.

Esta actividade enmárcase na programación da Rede Eusumo. A Rede Eusumo é unha rede de colaboración impulsada pola Secretaría Xeral de Emprego da Xunta de Galicia para o fomento do cooperativismo e a economía social, que conta con financiamento do Ministerio de Traballo, Migracións e Seguridade Social.