Estudantes de Gondomar achéganse ao cooperativismo con AGACA e Condes de Albarei
Esta mañá corenta de estudantes do IES Terra de Turonio (Gondomar) recibiu formación sobre o funcionamento dunha cooperativa nunha visita á adega Condes de Albarei e ao Pazo Baión
A actividade forma parte da Rede Eusumo, para impulsar a economía social e o cooperativismo como modelo de negocio de éxito.
Corenta estudantes de Secundaria e Formación Profesional do instituto Terra de Turonio participaron esta mañá nunha charla sobre as vantaxes do cooperativismo como opción de futuro laboral no sector agroalimentario, impartida por técnicos da Asociación Galega de Cooperativas Agroalimentarias (AGACA), enmarada na Rede Eusumo.
A charla destacou a toma democrática de decisións, o reparto equitativo de beneficios e a diminución do risco de emprendemento como cualidades positivas deste modelo de negocio, capaz de adaptarse a varios sectores produtivos e de servizos.
Ademais, perosal da adega explicou o funcionamento diario da cooperativa e o compromiso que implica ser socio para garantir o futuro da entidade. Para finalizar, os mozos e mozas puideron percorrer as instalacións do Pazo Baión e as viñas para coñecer o proceso de produción de viño.
Rede Eusumo
Esta actividade enmárcase no programa de actuación 2018 da Rede Eusumo. A Rede Eusumo é unha rede de colaboración impulsada pola Secretaría Xeral de Emprego da Xunta de Galicia para o fomento do cooperativismo e a economía social que conta co financiamento do Ministerio de Emprego e Seguridade Social.
Mércores, 11 April, 2018 - 16:45
