• Esta mañá corenta de estudantes do IES Francisco Asorey (Cambados) recibiron formación sobre o funcionamento dunha cooperativa nunha visita á adega Condes de Albarei e ao Pazo Baión

• A actividade forma parte da Rede Eusumo, para impulsar a economía social e o cooperativismo.

Santiago de Compostela, mércores 23 de maio de 2018. –  Corenta estudantes de Bacharelato e formación profesional do instituto cambadés Francisco Asorey participaron esta mañá nun obradoiro sobre as vantaxes do cooperativismo como opción de futuro laboral rendible e estable, impartido por técnicos da Asociación Galega de Cooperativas Agroalimentarias (AGACA) e da adega cooperativa Condes de Albarei en Cambados.

A charla destacou a toma democrática de decisións, o reparto equitativo de beneficios e a diminución do risco de emprendemento como cualidades positivas deste modelo de negocio, capaz de adaptarse a varios sectores produtivos e de servizos.

Ademais, perosal da adega explicou o funcionamento diario da cooperativa nun percorrido polas instalacións do Pazo Baión e as viñas para coñecer o proceso de produción de viño.

Rede Eusumo

Esta actividade enmárcase no programa de actuación 2018 da Rede Eusumo. A Rede Eusumo é unha rede de colaboración impulsada pola Secretaría Xeral de Emprego da Xunta de Galicia para o fomento do cooperativismo e a economía social que conta co financiamento do Ministerio de Emprego e Seguridade Social.