A Xunta de Galicia traballa na modificación da actual lexislación autonómica de cooperativas para adaptala aos novos tempos e facilitar a creación de entidades axilizando a burocracia, no marco dun procedemento participativo no que se prestará especial atención ás demandas dos protagonistas deste modelo de negocio. Así, coa intención de “escoitar e aprender do cooperativismo galego”, a conselleira de Promoción do Emprego e Igualdade, Elena Rivo, visitou en Ribadavia as adegas de Viña Costeira.

 

Aproveitando a visita á cooperativa vitivinícola, a conselleira destacou que a economía social implica ”solidariedade e darlle prioridade aos beneficios sociais antes que á rendibilidade financeira”. Tamén afirmou que cada vez hai máis cooperativas e que destaca o liderado das mulleres, xa que na nosa Comunidade case 29 000 mulleres forman parte de cooperativas, das cales preto de 27 000 son socias.

 

En termos económicos, Rivo salientou que a economía social ten un impacto anual duns 850 millóns de euros en Galicia, o que representa máis do 7 % do noso PIB. De feito, 21 cooperativas galegas sitúanse entre as 600 máis relevantes de España. Deste xeito, a conselleira definiu o cooperativismo como unha “fórmula moi importante para a economía galega”.

 

Nese senso, o Goberno galego apoia a economía social a través da Rede Eusumo, que leva máis dunha década acompañando ás entidades que apostan por este modelo de negocio e polo cooperativismo, así como a través de diferentes convocatorias de axudas. Estas son as que están abertas na actualidade:

 

Fonte: Xunta de Galicia