Este ano, os Premios á Cooperación foron para tres cooperativas ubicadas nas localidades de Fene, Vigo e Narón.

Os premios teñen por obxectivo impulsar esta fórmula económica e poñer en valor os seus principios entre a sociedade, así como recompensar publicamente o labor que as cooperativas veñen realizando coa súa aposta pola igualdade, a proximidade e a xeración de emprego na comunidade autónoma galega. Cada un dos premios está dotado con 5.000 euros.

O Premio aos valores cooperativos recaeu na cooperativa Aventeira de Fene, por ter destacado no impulso dos valores e principios cooperativos.

No caso do Premio ao mellor proxecto cooperativo novo o galardón foi para 13 Grados de Vigo. Neste caso, concédese por ter unha antigüidade igual ou menor a 42 meses (tres anos e medio) e destacar nas súas achegas nos aspectos sociais, económicos, culturais ou ambientais.

Por último, o Premio á traxectoria cooperativa foille concedido á Agroflor, cooperativa agraria con sede no polígono de A Gándara, en Narón, por ter unha antigüidade maior de 42 meses e destacar pola súa traxectoria no ámbito económico e social.

Estas tres entidades destacaron polo seu compromiso coa igualdade e por fomentar o apego ao territorio e as prácticas medioambientais respectuosas.