Este ano, do total de 15 solicitudes, os Premios á Cooperación foron para tres cooperativas ubicadas nas localidades de Ames, A Capela e Vigo.

Os premios teñen por obxectivo fomentar e difundir o cooperativismo e os seus principios e valores na sociedade, así como recompensar publicamente o labor que as cooperativas veñen realizando a prol do desenvolvemento do movemento cooperativo na comunidade autónoma galega. Cada un dos premios está dotado con 5.000 euros.

O Premio aos valores cooperativos recaeu na cooperativa Catro Ventos Editora de Vigo, debido a que é a cooperativa galega que máis destaca no impulso dos valores e principios cooperativos.

No caso do Premio ao mellor proxecto cooperativo novo o galardón foi para a cooperativa Cenlitrosmetrocadrado de Ames (A Coruña). Neste caso, concédese por ter unha antigüidade igual ou menor a 42 meses (tres anos e medio) e destacar nas súas achegas nos aspectos sociais, económicos, culturais ou ambientais.

Por último, o Premio á traxectoria cooperativa foille concedido á cooperativa Produtores del Campo de Capela da Capela (A Coruña), por ter unha antigüidade maior de 42 meses e destacar pola súa traxectoria no ámbito económico e social.

Podes consultar a publicación no DOG da Resolución do 1 de xuño de 2021, da Dirección Xeral de Emprego, Traballo Autónomo e Economía Social, pola que se fai pública a concesión dos premios á cooperación 2021.