A conselleira de Promoción do Emprego e Igualdade, María Jesús Lorenzana, participou o pasado 26 de decembro en Santiago de Compostela na xornada de resultados do programa Es-Mentoring, unha nova iniciativa piloto que impulsaron de xeito conxunto este ano Agaca, EspazoCoop e a Xunta de Galicia. Trátase dun programa dirixido a empresas que se atopan nun momento de crise ou proceso de cambio e que están interesadas en recibir asesoramento sobre como abordar a situación.

Es-Mentoring ofrece orientación a empresas da economía social. Na súa primeira edición, permitiu que 20 entidades, lideradas por 27 persoas, recibiran asesoramento para, entre outras cousas, fortalecer as súas relacións de intercooperación e mellorar as estratexias de identificación e resolución de problemas.

Este programa fomenta a colaboración entre as entidades da economía social, permitindo que as empresas mentorizadas poidan implementar melloras a través da experiencia e a aprendizaxe doutras empresas cunha ampla traxectoria nesta fórmula empresarial. Lorenzana destacou que Es-Mentoring é unha iniciativa importante para o crecemento das cooperativas e que debería consolidarse.

O orzamento da Consellería para 2023 aumenta o investimento na economía social nun 21%, ata os 42 millóns, para seguir promovendo esta fórmula, impulsando a creación de empregos e fomentando o traballo inclusivo a través da colaboración público-privada, que é considerada esencial para continuar avanzando na creación de emprego. Ademais, no próximo ano aprobarase a nova estratexia galega da economía social 2023-2026 e seguirase impulsando a Rede de polos de emprendemento e de apoio ao emprego, que tamén promove a economía social como unha fórmula de éxito para emprender.

Para rematar, Lorenzana destacou o papel que Agaca e EspazoCoop desempeñan na promoción deste modelo en Galicia, que, segundo afirmou, se basea “en principios de éxito” que pon ás persoas no centro e aproveita o seu talento.

Fonte: Xunta de Galicia