O pasado 23 de decembro celebrouse o 10º aniversario da Rede Eusumo, nun acto no que participou a conselleira de Promoción do Emprego e Igualdade, María Jesús Lorenzana, xunto cunha representación das principais entidades da Economía Social en Galicia.

Neste acto conmemorativo, Lorenzana agradeceu a traxectoria desta rede promovida pola Xunta de Galicia que, como indicou, contribúen a mellorar a contorna e xerar máis e mellores oportunidades para Galicia. A II Estratexia galega da Economía Social 2023-2026 que promove a Administración autonómica, avogará polos sectores emerxentes e  favorecerá a transición dixital, verde e cohesionada.

A conselleira quixo destacar o carácter pioneiro da Rede Eusumo nacida en 2012 co dobre obxectivo de apoiar a posta en marcha de novos proxectos cooperativos como motores da creación de emprego e para axudar a consolidar as empresas da Economía Social xa existentes mediante a mellora da súa competitividade.

Lorenzana sinalou a importancia de enfocar e xestionar a economía de forma diferente, de maneira que sexa un medio para o desenvolvemento persoal, profesional e comunitario. Tamén mencionou o potencial da Economía Social para ofrecer solucións innovadoras a retos globais, como a economía verde, o cambio climático, a transformación dixital e a inclusión social, desde o ámbito local.

A Xunta de Galicia comezará a traballar no comezo do ano para acordar coas entidades o contido da segunda estratexia galega da economía social (2023-2026). Este documento incidirá na recuperación da economía e aumentará a competitividade mediante a mellora da capacitación das persoas e das entidades. A estratexia tamén se centrará nos sectores económicos emerxentes e favorecerá a transición dixital, verde e cohesionada.

A Rede Eusumo é unha rede de empresas e entidades que seguen os principios da economía social. Foi precursora da colaboración público-privada e ten xogado un papel importante no microemprendemento cooperativo galego nestes últimos dez anos. A conselleira destacou que a economía social é unha realidade en Galicia, presente en todos os sectores económicos, con empresas de todos os tamaños e marcas líderes no mercado. Tamén insistiu na importancia de que a Rede Eusumo teña un futuro próspero e poida crear un ecosistema de economía social que inclúa as entidades e garanta un equilibrio territorial.

Finalmente, a conselleira de Promoción do Emprego e Igualdade afirmou que o Goberno galego é consciente de que investir na economía social é beneficioso porque axuda a crear redes, tecidos asociativos e aumenta as posibilidades de emprego na comunidade autónoma e o desenvolvemento territorial en Galicia.

Fonte: Xunta de Galicia

Vota unha ollada ao vídeo dos 10 anos da Rede Eusumo